European Social Forum (ESF) 2004 blir arrangert i London. Etter gigantarrangement i Firenze og Paris, kjem det omreisande venstresirkuset til den europeiske hovudstaden for nyliberalisme, Den tredje veg og War on Terror. Det tredje ESF i rekka finn stad midt i oktober. Og Alex Callinicos gler seg. Callinicos er professor ved Department of Politics ved universitetet i York. Han er marxist. Og mest sentralt: Han sit i sentralkomiteen i Socialist Worker's Party (SWP). Her i landet er SWP kanskje best kjent gjennom sin norske filial, Internasjonale Sosialister (IS). Det er ein del av britisk kommunist-tradisjon å oppretta filialar av seg sjølv i flest mogleg land. Sånn sett er også marxistane i England ganske engelske.