Sjølv om eg kan koma til å seia om einkvan som har fått for mykje i seg av det sterke at han er full som ei alke, må eg vedgå at eg, før eg slo opp i eit oppslagsverk, ikkje visste kvifor fulle folk vert samanlikna med denne nordatlantiske sjøfuglen. Men uttrykket vitnar om at formødrene og forfedrane våre visste meir om naturen enn mange av oss som mest ferdast i gater og stræte. Dei kjende til det vaggande ganglaget åt alka. Engelskmennene har uttrykket drunk as a lord, og her lyt det liggja ein type kulturkunnskap attom.