Vel tre år har gått sia det førre Høgre-byrådet i Oslo prøvde å få eit forsøk med valfritt sidemål i osloskolen. No blir det gjort ein ny freistnad frå det sitjande byrådet på å få til det same. Høgrepolitikaren Erling Lae, som også har prøvd seg som norsklærar, argumenterer med at sidemålsopplæringa er unyttig, og at den tar verdfull tid frå andre delar av norskfaget. Professor Finn-Erik Vinje har støtta opp med å gi inntrykk av at det finst eit vitskapleg grunnlag for å kunna seia at osloelevane kan få betre norskundervisning utan sidemål.