Arnljot Ask hevdar i gårsdagens Klassekampen at to konkrete setningar i Arundhati Roys tale ved opninga av World Social Forum, som vi trykte i avisa her på laurdag, er retusjert bort. Båe setningane har med samarbeidet med det alternative forumet, Mumbai Resistance, å gjere. Ask skuldar ikkje Klassekampen for sensuren, men hevdar at «den mest nærliggende forklaringen er vel at WSF har sendt ut denne friserte utgaven».Teksten vi trykte i Klassekampen har vi fått direkte på e-post frå Arundhati Roys eigen agent, Katie Levell. Det er ikkje gjort nokon form for redigering av teksten frå vår side.