Regjeringa har tidlegare lovt at kommunesektoren skal få kompensasjon krone for krone for dei ekstra utgiftene som vil følgja av at den differensierte arbeidgivaravgifta fell bort. Det har vore brei semje om at den differensierte arbeidsgivaravgifta er det viktigaste distriktspolitiske verkemiddelet i Noreg. Etter EØS-reglane må denne ordninga avviklast frå 1. januar 2004. No viser det seg at lovnaden om kompensasjon til kommunesektoren ikkje er oppfylt i statsbudsjettet. Ein rapport Nord-Trøndelagsforskning har laga for Landsdelsutvalet for dei fire nordlegaste fylka og Kommunenes Sentralforbund dokumenterer at det manglar om lag 104 millionar i statsbudsjettet for å gi full kompensasjon til kommunesektoren.