Bjørgulv Braanen har ein interessant kommentar til Makt- og demokratiutgreiinga i Klassekampen den 23. september under tittelen «Nostalgi». Han er heller ikkje åleine om å lesa nostalgi inn i utgreiinga. Jan Petersen, leiar i Høgre, skildrar utgreiinga nærmast som eit nostalgisk og sosialdemokratisk prosjekt i ein kronikk i Dagbladet den 16. september. Den les eg som eit forsøk på å sleppa å gå verkeleg inn i det maktutgreiinga seier. Slik les eg slett ikkje Braanen, men konsekvensen kan likevel lett bli den same. Når eg høyrer ordet nostalgi er det nemleg to forhold eg tenkjer på med det same – og eg er nok ikkje åleine. Det eine er at ein forutset at fortida var betre enn korleis det no er, det andre at fortida gjerne ikkje var så pass bra som vi skildrar ho. Begge peikar i retning av at utgreiinga er reaksjonær i ordets eigentlege meining.