Straumen skapar ein omfattande materiell komfort og eit personleg handlingsrom som gjer oss alle sårbare. Trusselen mot tryggheita viser seg ikkje ved aggresjon frå utsida, men ved små samanbrot på innsida. I USA er alt stort. 14. august slo eit massivt straumbrot ut kvardagslivet for over 50 millionar menneske. Straumbrota i New York er alltid spektakulære, dei største før dette var i 1964 og 1977, då det kom til midlertidige sivilisasjonssamanbrot i byen. I 2003 såg me gater overfylte med rådville menneske som venta og venta. For det er jo alt ein kan gjera når kvardagslivet er sett på pause.