I det offentlege ordskiftet om bruken av pengar frå Statens petroleumsfond har åtvaringar mot «hollandsk sjuke» vore ein fast gjengangar. Kort fortalt går argumentasjonen om denne «sjuka» ut på følgjande: Utgangspunktet er at økonomien har tre sektorar; (1) ein meir eller mindre kortliva «valutatenande» sektor (som regel råvarebasert), som i Norge sitt tilfelle er olje- og gassektoren; (2) ein konkurranseutsett sektor (i hovedsak ulike typar industri); og (3) ein skjerma sektor, som produserer ulike tenester som ikkje (eller i svært liten grad) inngår i internasjonal handel. Det blir dessutan antatt at det heile tida er full sysselsetting og at utanrikshandelen er i balanse.