** Eg held ofte kurs i målvitskap for nye studentar, og jamt har det vore spanande å så frø i ugrasfrie hagar. No er likevel mang ein «ny» student eit velvakse menneske med mange vrange tankar, og lukingsarbeidet kann verta tungt. Då eg byrja med denne undervisningi, var eg attpå til so vidt yver dei tretti, og ikkje alle studentar med fleire år på baken sette lit til alt den unge jyplingen vrengde or seg. Det er ikkje so mange åri sidan eg fekk høyra at «du segjer jo mykje rart, då», og eg hadde – kross på halsen – ikkje sagt noko som vilde få kollegaene mine til å lyfta på augnebrunene.