Sia i fjor haust har det vore mykje debatt om den såkalla kraftkrisa. Faktum er at det ikkje er noko krise i form av produksjonskapasitet, men heller ei krise for dei som må betale rekninga. Det har kome lite debattinnlegg frå kraftnæringa - dei sit i glashus og heldt klokeleg kjeft. Men noko av det vetle som har kome fram, er så feilaktig at det må tilbakevisast:1. Statkraft påstår at vi i eit normalår må importere tilsvarande 500.000 husstandar sitt forbruk. Eit normalår dreier seg ikkje om nedbør, slik mange trur. Normalåret er gjennomsnittleg produksjon i tilsigsperioden 1970-99. Kraftnæringa produserer det dei får seldt til godtakande pris. Elles vil vatnet renne forbi eller verte samla opp. I år 2000 vart det produksjonsrekord fordi to atomreaktorar vart kopla ut i grannelandet. Om dei hadde vore i produksjon, hadde vatnet anten vorte samla opp eller runne forbi ubrukt.