Grong kommunestyre i Nord-Trøndelag er høgst sannsynleg det første i landet som har gjort vedtak som krev at EØS-avtalen må seiast opp. SV og Senterpartiet utgjorde fleirtalet med tolv røyster i kommunestyremøtet 27. mars, medan Ap og Høgre, til saman åtte, røysta imot. Venstre-representanten var ikkje til stades på dette møtet. Fleirtalsvedtaket peiker på at EØS-tilknytinga fører til ei vesentleg svekking av distriktspolitikken, landbrukspolitikken og velferdspolitikken, og konkluderer med at Grong kommunestyre «går inn for å si opp EØS-avtalen snarest mulig». Verknadene av at den differensierte arbeidsgivaravgifta blir borte er det som har gjort spørsmålet spesielt aktuelt, og var årsaka til at Steinar Sæternes (SV) reiste framlegget om at EØS-avtalen må seiast opp akkurat no.