– Noreg har generelt ikkje stilt ordinære forhandlingskrav til utviklingsland. Denne oppsiktsvekkjande opplysninga kom utviklingsminister Hilde Frafjord Johnson (KrF) med i Stortinget i går. Det var i eit svar til Audun Lysbakken (SV) at Frafjord Johnson kom med påstanden om at dei hemmelegstempla krava Noreg har stilt til mange utviklingsland i Gats-forhandlingane eigentleg ikkje er krav. Lysbakken stilte spørsmål på bagrunn av at EUs lange rekke med offensive krav mot 94 fattige land vart kjent gjennom ein lekkasje 25. februar. EU vil ha avregulering av sentrale sektorar som banktenester, vassforsyning og energi, også i dei fattigaste landa. EU stiller i hovudsak krav på område der Unionen har marknadsleiande selskap.