EUs handelskommissær Pascal Lamy insisterer på at regjeringane i EU-landa ikkje lar dei folkevalde få innsyn i informasjon om EUs posisjonar i forhandlingane om Generalavtalen om handel med tenester (Gats). Alle medlemsland i WTO skal senda svar på krav som er stilt i Gats-forhandlingane innan 31. mars. Her vil det stå kva tenestesektorar landa i utgangspunktet går med på å deregulera. Kommisjonen lagar eit samla svar på vegner av EU-landa. Fyrste utkast var ferdig i slutten av januar. Etter tidsplanen skal medlemslanda kommentera det innan midten av februar. I mars kjem eit andre utkast, som går til godkjenning i medlemslanda innan Gats-fristen 31. mars. Forhandlingane gjeld sentrale samfunnsområde som helse, utdanning, postvesen, media, finanssektoren og så vidare. Like fullt insisterte Pascal Lamy i førre veke på at regjeringane held informasjonen frå kommisjonen hemmeleg.