Høgsterett skal ta stilling til om nazist Terje Sjølie har lov til å ytra offentleg at «Hver dag raner, voldtar og dreper innvandrere nordmenn, hver dag blir vårt folk og land plyndret og ødelagt av jødene», og så vidare. Sjølie vart frifunne i Halden byrett og deretter dømt i Borgarting lagmannsrett. Denne veka går saka for høgste domstol i landet. Sjølie kan bli felt av paragraf 135a i straffelova, den såkalla rasismeparagrafen. Han kan bli redda av paragraf 100 i Grunnlova, som vernar ytringsfridomen. Professor Francis Sejersted tek ikkje stilling i saka mot Sjølie, men understrekar at diskriminerande utsegner ikkje automatisk er straffbare.