Erna Solberg hadde ikkje vore riktig klok dersom ho hadde gjort Per Sandberg til innvandringsminister, slik NRK varsla i går tidleg. Meldinga var i ferd med å påføre partitoppane i støttepartia KrF og Venstre kollektivt hjarteinfarkt, før ho vart dementert. Nestleiaren i Framstegspartiet har det siste året provosert KrF og Venstre meir enn heile den blåblå regjeringa til saman, særleg med utfall i innvandringspolitikken og angrep på støttepartia. Han har gjort samarbeidet med KrF og Venstre vanskelegare, slik Venstre-leiar Trine Skei Grande sa til NTB i går formiddag.